Malampusong gibuhat sa Dapitan City ENRO, City Agriculture Office, ug CENRO Piñan ang translocation sa mga itlog sa pawikan nga nakit-an sa Sunset Boulevard, Barangay Dawo, alas 10 sa buntag, Enero 28, 2026.
Nakitaan og duha ka nesting site daplin sa baybayon nga delikado tungod sa kalihokan sa tawo ug natural nga hulga sama sa baha ug mananap. Gikan sa Nest 2, 105 ka itlog sa pawikan ang maampingong nakuha ug nadokumento sa mga otoridad. Samtang ang Nest 1, una nang nabalhin niadtong Enero 12 pinaagi sa inisyatiba sa mga residente sa lugar.
Gisunod pag-ayo ang hustong pamaagi sa paghipos sa itlog aron malikayan ang kadaot, lakip ang pagpanalipod sa orihinal nga posisyon niini. Dayon, ang mga itlog gibalhin sa usa ka luwas ug giabantayang hatchery aron masiguro ang kaluwasan sa mga mapusa nga pawikan.
Gidayeg sa City Government of Dapitan ang paningkamot sa mga ahensya ug komunidad sa pagpanalipod sa marine biodiversity sa dakbayan. Giawhag usab ang publiko nga dayon motaho sa mga awtoridad kon adunay makit-ang pawikan o nesting activity aron dali matagan og aksyon.(IKEN B. GULLEM)
Source: City Government of Dapitan