Nakapahimulos ang mga residente sa Barangay Bethlehem ug kasikbit nga mga barangay sa Polanco sa nagkalain-laing libreng serbisyo atol sa “Doble Serbisyo Barangay Caravan” nga gipahigayon aron mapaduol ang mga batakang serbisyo sa katawhan.
Gidala mismo sa barangay ang libreng medical consultation, tambal, laboratory services, operasyon tuli, legal assistance, veterinary ug agricultural services, libreng haircut, ug pagproseso sa birth certificate pinaagi sa Civil Registrar ug Philippine Statistics Authority alang sa mga walay rehistro.
Ang maong inisyatiba gipangunahan ni Polanco Mayor Shaia Ruth Uy uban sa suporta sa Provincial Government sa Zamboanga del Norte ubos sa liderato ni Gov. Darel Dexter Uy. Sa mensahe ni Julius Napigquit, iyang gipasiugda nga padayon ang paningkamot sa probinsyal nga pangagamhanan sa pagpaduol sa libre ug dekalidad nga serbisyo ngadto sa katawhan.
Dako usab ang natabang sa mga doktor gikan sa Rural Health Unit sa Polanco nga gipangulohan ni Dr. Sheila Jaralve ug sa Provincial Health Office nga gipangulohan ni Dr. Benson Panaguiton sa paghatod og accessible nga serbisyo medikal ngadto sa mga residente sa barangay.(IKEN B. GULLEM)
Source: Zamboanga del Norte Provincial News Network