Nakadawat og cash assistance ug agricultural support ang 200 ka mag-uuma gikan sa pito ka barangay sa Siayan atol sa implementasyon sa Project LAWA at BINHI nga gipahigayon sa Siayan Municipal Gymnasium aron mapalig-on ang produksyon sa pagkaon ug panginabuhian sa mga farming communities.
Kini nga programa gipatuman pinaagi sa panagtambayayong sa Department of Social Welfare and Development, Provincial Government sa Zamboanga del Norte, ug Local Government Unit sa Siayan isip kabahin sa kampanya sa gobyerno alang sa mas lig-on nga agrikultura ug suporta sa mga kabus nga mag-uuma.
Ubos sa Cash-for-Work ug Cash-for-Training Program, gipanghatag ang kapin P1.6 milyon nga ayuda diin matag benepisyaryo nakadawat og P8,280 human sa 20 ka adlaw nga trabaho ug training. Dungan usab nga gipanghatag ang nagkalain-laing farm inputs pinaagi sa Enhanced Gasang Bahandianon sa Umahan Program sa Office of the Provincial Agriculturist.
Walo ka farmer associations ang nakadawat og vegetable production inputs nga nagkantidad og P479,606 samtang usa ka asosasyon usab ang nakabenepisyo sa broiler production package nga nagkantidad og P170,790. Lakip usab sa gipanghatag ang tilapia fingerlings, rice seeds, rice threshers, ug uban pang kagamitan sa pagpanguma aron mapadako pa ang produksyon sa agrikultura sa lungsod.
Gipahigayon usab sa mga personnel sa OPAG ang demonstration sa food preservation pinaagi sa pickling ug drying aron matabangan ang mga komunidad sa hustong pagproseso ug pagpreserbar sa ilang ani isip kabahin sa sustainability efforts sa proyekto.(IKEN B. GULLEM)
Source: Gov. Darel Uy