Gipahigayon sa City Government of Dipolog ang blessing ug groundbreaking ceremony alang sa pagtukod sa Warehouse I sa Dipolog Port Terminal sa Barangay Galas niadtong Agosto 1, isip kabahin sa padayon nga paningkamot sa pagpalig-on sa imprastraktura sa pantalan ug pagsuporta sa kalamboan sa lokal nga ekonomiya.
Gipangulohan ang kalihokan nila City Mayor Roberto Y. Uy, City Vice Mayor Senen O. Angeles, Port Manager Alejandro June I. Carasig, ug City Planning and Development Coordinator Engr. Albert S. Alimpulos, nga mipadayag sa ilang suporta sa proyekto ug sa padayon nga pagpalambo sa serbisyo sa pantalan.
Gipangunahan usab ni Pastor Vicente Barnarona Jr. ang blessing sa proyekto ug nag-ampo alang sa hapsay ug malampusong implementasyon niini.
Gilauman nga ang Warehouse I makadugang sa kapasidad sa Dipolog Port Terminal sa pagtipig ug pagdumala sa mga kargamento, nga makatabang sa pagpauswag sa operasyon sa pantalan ug sa paghatag og mas episyenteng serbisyo ngadto sa mga negosyante, stakeholders ug sa publiko.
Matud sa City Government, ang pagtukod sa Warehouse I usa sa mga inisyatiba aron mapalig-on ang imprastraktura sa pantalan, mapadali ang mga serbisyo sa logistics ug transportasyon, ug mapalambo ang mga kalihokan sa negosyo nga makatampo sa dugang nga pagtubo sa ekonomiya sa Dakbayan sa Dipolog.(IKEN B. GULLEM)
Source: Dipolog City Government