Midawat ug mainiton nga pagdayeg gikan sa Department of the Interior and Local Government (DILG) Region IX ang Lokal nga Kagamhanan sa Dipolog human kini malampusong mipasar sa 2025 Seal of Child-Friendly Local Governance Audit (CFLGA) kaniadtong Disyembre 15.
Nakab-ot sa siyudad ang iskor nga 78.50 o 98.13%, nga nagbutang niini sa ikatulong pwesto tali sa 39 ka siyudad ug munisipalidad sa rehiyon. Sumala sa DILG, ang kalampusan nagpakita sa lig-on nga paningkamot sa LGU sa pagpanalipod ug pagpalambo sa kaayohan sa mga kabataan pinaagi sa child-friendly nga mga programa ug serbisyo.
Giila usab sa ahensya ang hiniusang kahago sa mga lokal nga opisyal, ahensya, ug stakeholders sa pagpalig-on sa mga mekanismo nga nagsiguro sa kaluwasan, partisipasyon, ug paglambo sa kabataan. Gilauman sa DILG nga ang maong pasidungog mahimong inspirasyon sa ubang LGU sa rehiyon aron mas pauswagon pa ang mga inisyatibo alang sa kabataan.(IKEN B. GULLEM)
Source: Dipolog City Government