Gipadayag ang kusog sa panaghiusa ug kooperasyon sa ikatulong adlaw sa 2026 Regional Planning Workshop nga gipahigayon sa milaby nga adlaw didto sa Manuel Resort sa lungsod sa Piñan, Zamboanga del Norte, pinaagi sa usa ka aktibong team-building activity sa mga empleyado sa PSA Region IX.
Misugod ang kalihukan sa sayong buntag uban sa usa ka Zumba Dance Workout aron mapukaw ang kusog ug kahinam sa mga partisipante. Gisundan kini sa opisyal nga pagsugod sa team building, diin gihatag ang opening remarks ni Chief Statistical Specialist Atty. Richard D. Tabigne sa PSO Zamboanga Sibugay, samtang gipangulohan ni PSA IX Regional Director Mewchun W.S. Pamaran ang Oath of Sportsmanship.
Gipasabot sa mga game masters nga sila Assistant Statistician Moriancumer A. Cabasag ug Statistical Analyst Lanibel A. Pamatong ang mga mekaniks sa dula, ug gibahin ang mga partisipante ngadto sa upat ka grupo: Caraxes Team Red, Dreamfyre Team Blue, Moondance Team Green, ug Sunfyre Team Yellow. Sa pagtapos sa mga kalihukan, mitungtong isip overall winner ang Moondance Team Green.
Sumala sa mga organizer, ang maong team-building activity nakatabang sa pagpalig-on sa panag-amigo, pagsalig, ug teamwork sa mga kawani sa PSA Region IX, nga gilauman nga maghatag og mas lig-on nga kooperasyon sa ilang trabaho ug serbisyo publiko.(IKEN B. GULLEM)
Source: PSA Zamboanga del Norte