“If your plan is for one year, plant rice. If your plan is for ten years, plant trees. If your plan is for one hundred years, educate children.” Kini mao ang gipadayag ni City Schools Division Superintendent, Dr. Danny B. Cordova (kinutlo gikan sa panultihon ni Confucius) isip tipik sa iyang mensahe atol sa gipahigayon nga “State of the Division Address cum Stakeholders Summit” kaniadtong Pebrero 2, ning tuiga didto sa Top Plaza Atrium, ning dakbayan.
Mitambong sa nasangpit nga kalihokan si City Mayor Darel Dexter T. Uy, kinsa mihatag sa iyang “inspirational message” uban nila ni Assistant City Schools Division Superintendent, Ms. Lourma I. Poculan ug School Governance & Operations Division (SGOD) Chief, Mr. Nur N. Hussein, kinsa mipadayag usab sa ilang tagsa-tagsa ka mga mensahe sa maong okasyon.
Tipik usab sa State of the Division Address ni SDS Cordova ang pagsaysay niya sa kasamtangang kahimtang sa mga eskwelahan dinhi sa siyudad ilawom sa iyang administrasyon lakip na ang mga programa ug mga aktibidades nga ilang gipatuman alang sa kalampusan ug kalamboan sa DepEd Dipolog City Schools Division.
Aduna usa’y nahitabong “Awarding Ceremony” alang sa “2022 Brigada Eskwela Best Implementing Schools Award”, “Brigada Pagbasa Advocacy Award” ug “Functional Home Learning Spaces Award” lakip na ang paghatag og pasidungog ngadto sa mga “Division External Stakeholders” ilabina kang Mayor Uy ug sa Kagamhanang Lokal ning dakbayan (Plaque of Recognition) isip pag-ila ug pagpasalamat sa ilang suporta ug kontribusyon sa pagpalambo sa estado sa edukasyon dinhi sa siyudad.
(Source: Dipolog City Government Facebook page)