Gibansay ug gipahinumdoman sa ilang importante nga papel sa komunidad ang 45 ka Child Development Workers (CDWs) ug Child Development Teachers (CDTs) atol sa Capability Building Workshop nga gipahigayon sa City Social Welfare and Development Office (CSWDO) pinaagi sa Early Childhood Care and Development (ECCD) Unit niadtong Hunyo 8 sa Top Pension, Dipolog City.
Kini nga kalihokan maoy opisyal nga pagsugod sa selebrasyon sa CDWs and CDTs Week nga pagasaulogon gikan Hunyo 8 hangtod 11. Mitambong usab ang mga Cluster-In-Charges ug mga kawani sa CSWDO aron ipakita ang ilang suporta sa mga frontline workers sa sayong edukasyon sa kabataan.
Gihatagan ang mga partisipante og mga sesyon kabahin sa values formation, personality development, self-care methods, ug professional growth aron mapalig-on ang ilang personal ug propesyonal nga kapasidad isip mga tig-atiman ug magtutudlo sa mga bata. Gipasundayag usab ang kahinungdanon sa Child Protection Policy pinaagi sa usa ka interaktibong diskusyon nga nagtumong sa pagpalambo sa kahibalo ug responsibilidad sa pagpanalipod sa mga kabataan.
Kabahin usab ang workshop sa padayon nga paningkamot sa lokal nga panggamhanan sa pagpalambo sa kalidad sa early childhood education ug sa paghatag og mas maayong serbisyo alang sa mga kabataan sa Dakbayan sa Dipolog.(IKEN B. GULLEM)
Source: Dipolog City Social Welfare and Development Office