Malipayon si Dr. Rose Fruto-Garcia nga nahimong kabahin sa Dental Team sa 292nd Tzu Chi Medical and Dental Mission nga nagpadayon karong Agosto 8, 2026 sa Zamboanga del Norte Convention and Sports Center, Dipolog City, isip boluntaryong serbisyo alang sa mga nanginahanglan.
Si Dr. Garcia dugay nang miyembro sa Tzu Chi International Medical Association o TIMA, nga gilangkuban sa mga medical professional gikan sa nagkalain-laing nasud nga boluntaryong naghatag sa ilang panahon, kahibalo ug kahanas. Matud niya, dili lamang pinansyal nga tabang ang paagi sa pagserbisyo kondili apil usab ang kinasingkasing nga paghatag sa kahibalo ug propesyon.
Gibutyag ni Dr. Garcia nga 12 ka dentista ang nagserbisyo isip kabahin sa 66 ka mga doktor sa maong medical mission. Ang Tzu Chi Foundation usab ang nagdala sa dental equipment sama sa dental chairs ug instrument sterilizer aron mapadali ang mga serbisyo sa mga pasyente.
Giawhag ni Dr. Garcia ang publiko, ilabina ang mga ginikanan, nga sugdan ang hustong pag-atiman sa ngipon sukad pa pagkabata.(JENIFFER JR. DELICA)
Source: Zamboanga del Norte Provincial News Network