Mitabang ang Emergency Medical Services sa Dapitan City Fire Station sa usa ka 67 anyos nga lalaki nga naangol sa Barangay Sinonoc, Dakbayan sa Dapitan niadtong Hulyo 15 human kini matumba. Sumala sa impormasyon nga nakuha sa mga responder, ang pasyente nakainom og tuba ug adunay sakit nga nakaamot sa maong insidente.
Pag-abot sa mga responder, ilang nasuta nga alerto ang pasyente apan adunay mga samad sa nawong, mga tuhod ug sa wala nga tudlo sa tiil. Matud pa sa iyang anak, ang pasyente adunay Alzheimer’s disease ug wala na mahinumdumi ang nahitabo.
Gihatagan dayon og first aid ang pasyente pinaagi sa paghinlo ug pagbugkos sa iyang mga samad samtang padayon nga gibantayan ang iyang kahimtang sa wala pa siya ibalhin sa ambulansya.
Gidala ang pasyente ngadto sa Dr. Jose Rizal Memorial Hospital alang sa dugang medikal nga ebalwasyon ug pagtambal subay sa hangyo sa iyang anak.(JENIFFER JR. DELICA)
Source: BFP R9 Dapitan City Fire Station