Maglunsad ang Department of Environment and Natural Resources pinaagi sa Environmental Management Bureau Region IX og duha ka adlaw nga “DENR Express Permitting On Wheels” karong Mayo 25 ug 26, 2026 didto sa City Mall sa Dipolog City aron mapadali ang pagproseso sa environmental permits ug mapakunhod ang red tape sa serbisyo sa gobyerno.
Sugod alas 10:00 sa buntag hangtud alas 5:00 sa hapon ang maong kalihukan nga nagtumong sa pagtabang sa mga lokal nga kagamhanan, business operators ug stakeholders sa ilang aplikasyon alang sa nagkalain-laing permits, clearances ug registration ubos sa environmental regulations sa nasud.
Lakip sa mga serbisyong mahimong ma-avail mao ang Environmental Compliance Certificate o ECC, Certificate of Non-Coverage, Permit to Operate alang sa air pollution installations, Wastewater Discharge Permit, Hazardous Waste Generator ID Registration, ug accreditation sa Pollution Control Officers o PCOs.
Giawhag sa EMB Region IX ang tanang business establishments ug project proponents sa Dipolog ug tibuok Zamboanga del Norte nga mopahimulos sa programa aron mapaspas ang ilang aplikasyon ug masiguro ang pagsunod sa environmental laws subay sa Memorandum No. 2018-152 sa DILG nga nagmando sa pagkuha og ECC sa dili pa ipatuman ang environmental-related projects.(JENIFFER JR. DELICA)
Source: Dipolog City Government