Mitambong ang 43 ka Barangay Nutrition Scholars o BNS sa Dipolog City sa Food Safety Training-Workshop nga gipahigayon niadtong Mayo 20, 2026 didto sa ikaduhang andana sa Museo Dipolog aron mapalambo ang ilang kahibalo sa luwas nga pagdumala sa pagkaon ug pagkuha sa ilang Health Cards.
Gipahigayon ang maong pagbansay sa Department of Science and Technology pinaagi sa City Nutrition Services Division aron mas masangkapan ang mga BNS sa hustong pamaagi sa food handling ug sanitation alang sa kaayohan sa komunidad.
Nagserbi isip lecturers sila Mr. Ruben M. Lim Jr., Project Technical Specialist I, ug Ms. Merly D. Alivio, Science Research Specialist II, diin ilang gipaambit ang importansya sa pagsunod sa food safety standards aron malikayan ang sakit nga mahimong gikan sa pagkaon.
Gipasiugda sa maong workshop ang padayong paningkamot sa lokal nga kagamhanan sa pagpalig-on sa kapasidad sa mga community nutrition workers ug pagsiguro sa mas luwas ug mas himsog nga food practices sa matag barangay sa Dipolog City.(JENIFFER JR. DELICA)
Source: Dipolog City Government