Nagsugod na ang Department of Environment and Natural Resources (DENR) Region IX sa pagtukod sa Marine Scientific Research Station sa Barangay Lumbal, Vincenzo Sagun, Zamboanga del Sur niadtong Pebrero 11.
Nahimutang kini sa Coral Triangle tali sa Sulu ug Celebes Seas ug magsilbing sentro sa pagtuon ug pagsubay sa kahimtang sa dagat ug kabaybayonan sa Zamboanga Peninsula ug Sulu-Celebes. Lakip sa buluhaton niini ang pagsubay sa ekosistema, pagtuon sa nagkalain-laing klase sa kinabuhi sa dagat ug ilang puy-anan, pagtan-aw sa kahimtang sa isda ug bahura, ug pagsusi sa kalidad sa tubig aron magiya ang hustong pagdumala sa yamang-dagat.
Duol ang estasyon sa Dumanquilas Bay Protected Landscape and Seascape ug maghatag og teknikal ug siyentipikong suporta sa Protected Area Management Board aron mapalig-on ang pagpanalipod sa lugar. Gipangunahan ang kalihokan ni Ernesto D. Adobo Jr. nga mipasiugda sa kahinungdanon sa siyensya sa paghimo og mga desisyon sa gobyerno.
Target nga mahuman ang pasilidad sulod sa 2 ka tuig human sa pagsusi sa lugar ug pakighinabi sa mga hingtungdan sumala sa mga lagda sa gobyerno. Pinaagi niini, gipalig-on sa DENR IX ang pag-atiman sa kadagatan aron masuportahan ang panalipod sa kinaiyahan, malungtarong pangisda, ug kaayohan sa mga komunidad sa baybayon.(JENIFFER JR. DELICA)
Source: DENR Zamboanga Peninsula