Arestado ang usa ka 30 anyos nga lalaki atol sa gikasa nga hiniusang buy-bust operation nga gihimo sa Regional Intelligence Division (RID9) sa Labason Municipal Police Station ug PIU, ZNPPO didto sa Purok 5, Barangay San Antonino, Labason Zambonga del Norte mga alas 8:15 hangtod alas 9:25 ang takna sa kabuntagon niadtong Pebrero 11,2026
Ang maong suspek naila nga usa ka lalaki,ulitawo ug residente sa Purok 9, Barangay Osukan, Labason, Zamboanga Del Norte,kinsa gidakop tungod sa paglapas sa Republic Act 10591 (Comprehensive Firearms and Ammunition Regulation Act).
Nakumpiska gikan sa suspek atol sa operasyon mao ang usa ka kalibre 9mm nga pistola (KBI INC Harmsburg PA), usa ka magazine assembly, pito ka piraso sa 9mm nga buhing bala, usa P500 nga gigamit isip buy-bust money, kwarenta ka piraso sa tig usa ka libo ka pesos nga kwarta nga gigamit isip boodle money,usa ka cellphone ,usa ka PhilHealth ID, ug usa ka itom nga sling bag nga gigamit isip sudlanan.
Ang beripikasyon niini nakuha gikan sa Philippine National Police Civil Security Group Firearms and Explosives Office nagbutyag nga ang suspek walay License to Own and Possess Firearms (LTOPF), nga usa ka paglapas sa R.A. 10591.
Ang suspek gipahibalo sa hinungdan sa iyang pag-aresto ug mga katungod sa konstitusyon sa usa ka pinulongan nga iyang nasabtan ug ang mga nakumpiska nga butang, gidala sa Labason Municipal Police Station alang sa dugang nga dokumentasyon ug hustong disposisyon.(MEDALYN U. BORJA)
Source: ZNPPO