Gilunsad sa siyudad sa Dipolog ang usa ka community donation drive nga nagtumong sa paghatag og educational toys, libro, ug learning materials alang sa mga batang ubos sa lima ka tuig ang panuigon isip suporta sa ilang sayong pagkat-on ug paglambo.
Ang “Toys and Learning Materials Donation Drive” nag-awhag sa publiko sa pagdonar og mga gamit sama sa soft toys, puzzles, blocks, toy cars, stacking toys, board books, picture books, storybooks, flashcards, crayons, activity books, ug educational games.
Sumala sa mga organisador, ipang-apod-apod ang mga donasyong materyales ngadto sa mga Day Care Centers sa pagsugod sa klase aron makatabang sa pagpauswag sa early childhood learning pinaagi sa suporta sa komunidad ug pagpakabana sa kabataan.
Samtang, padayon ang donation drive hangtod Mayo 28, 2026 gikan alas 7:00 sa buntag hangtod alas 6:00 sa gabii, matag Lunes hangtod Huwebes. Mahimong ihatud usab ang mga donasyon sa PSWD Office nga nahimutang sa ground floor sa Capitol Building sa Estaka, Dipolog City.(IKEN B. GULLEM)
Source: Zamboanga del Norte Provincial News Network