Miabot na sa Dipolog City ang unang grupo sa mga doktor, nars ug uban pang healthcare workers sa Tzu Chi Foundation alang sa ika-292 nga Medical and Surgical Mission nga ipahigayon karong Agosto 6 hangtod 8 sa Zamboanga del Norte Medical Center (ZNMC).
Ang unang delegasyon gikan sa Zamboanga City miabot sa kagabhion sa Agosto 4 ug dayon mipadulong sa ZNMC aron magsugod sa ilang preparasyon alang sa tulo ka adlaw nga humanitarian mission.
Niadtong buntag sa Agusto 5, miabot usab ang laing delegasyon gikan sa Manila ug giabiabi sa arrival team sa airport sa Dipolog.
Samtang, sugod alas-7:00 sa buntag, gisugdan na usab ang pagdawat ug pagproseso sa mga pasyenteng naka-iskedyul alang sa surgical procedures isip kabahin sa pagpangandam sa maong misyon.
Atol sa tulo ka adlaw nga kalihokan, libre nga ihatag ang medical consultations, surgical services, ug uban pang healthcare assistance ngadto sa mga kwalipikadong benepisyaryo sa Zamboanga del Norte.
Ang maong misyon gipahigayon pinaagi sa panagtinabangay sa Tzu Chi Foundation, Zamboanga del Norte Medical Center, Provincial Government of Zamboanga del Norte, ug mga partner agencies aron mapadayon ang paghatag og libreng serbisyo sa panglawas ngadto sa mga nanginahanglan.(IKEN B. GULLEM)
Source: Zamboanga del Norte Provincial News Network