Gipalig-on sa Department of Agrarian Reform (DAR)–Zamboanga del Norte ug sa Local Government Unit sa La Libertad ang ilang panagtinabangay aron mas mapalambo ang paghatod sa mga programa ug serbisyo alang sa mga Agrarian Reform Beneficiaries (ARBs) sa lungsod.
Miadto sa usa ka courtesy visit kang La Libertad Mayor Ricky R. Cuenca si Provincial Agrarian Reform Program Officer II Daisy Dell Suan Digamon uban nila Provincial Agrarian Reform Adjudicator Atty. Avito G. Zamora, PARPO I Engr. Alfonso A. Tan ug ubang kawani sa DARPO aron hisgutan ang mga kasamtangang proyekto ug mga umaabot nga inisyatiba sa ahensya.
Gipresentar atol sa panagtigom ang mga update sa mga programa sa agrarian reform, mga nahimo sa ahensya ug mga prayoridad nga kalihokan, lakip na ang panginahanglan sa padayon nga suporta sa LGU sa mga proyekto nga makatabang sa mga benepisyaryo sa repormang agraryo.
Gipasiugda ni Mayor Cuenca nga pareho ang tumong sa DAR ug sa LGU sa pagpauswag sa panginabuhian sa mga mag-uuma ug pagdasig sa malungtarong kalamboan sa mga komunidad sa kabanikanhan, samtang gipasig-uli sa DAR ang pasalig niini sa paglig-on sa pakigtambayayong sa mga lokal nga panggamhanan alang sa inklusibong pag-uswag ug paghatag og mas maayong serbisyo sa mga ARBs.(JENIFFER JR. DELICA)
Source: DAR Zamboanga del Norte Province