Naluwas ang usa ka batan-ong Brahminy Kite o Haliastur indus sa Barangay Timan, Liloy human kini gitaho sa usa ka maloloy-ong residente ngadto sa Community Environment and Natural Resources Office (CENRO) Liloy aron matabangan ug mapanalipdan.
Gikuha sa mga personnel sa CENRO Liloy ang maong langgam niadtong Hunyo 3 human makadawat og report gikan kang Tito Elogsong, nga nakakita niini sa huyang nga kahimtang duol sa iyang pinuy-anan. Matud pa niya, iyang namatikdan nga gisamok sa mga uwak ang maong langgam alas 1:30 sa hapon niadtong Hunyo 2.
Gihatagan ni Elogsong og temporaryong kapasilongan ug proteksyon ang Brahminy Kite samtang nakigkoordinar siya sa mga otoridad sa DENR. Human niini, giturn-over ang langgam ngadto sa CENRO Liloy alang sa pag-assess ug hustong pag-atiman.
Sa inisyal nga obserbasyon, walay nakitang samad sa maong langgam ug padayon kining ginamonitor sa wildlife holding facility sa opisina. Gidayeg sa CENRO Liloy ang maayong binuhatan ni Elogsong ug giawhag ang publiko nga dayong motaho sa mga samaran, nalisang, o nahisalaag nga ihalas nga mananap aron maseguro ang ilang kaluwasan ug hustong pagdumala.(JENIFFER JR. DELICA)
Source: DENR Zamboanga Peninsula