Gipalig-on sa Department of Agrarian Reform–Zamboanga del Norte (DAR-ZN) ang pagpatuman sa gender mainstreaming pinaagi sa paghasa sa kahibalo ug kapasidad sa mga opisyal ug personnel niini sa Gender and Development (GAD) Planning, Budgeting, and Auditing Workshop sa Top Plaza Hotel, Dipolog City.
Gipangunahan ni Provincial Agrarian Reform Program Officer (PARPO) II Daisy Dell Suan Digamon ang kalihokan nga gitambongan sa mga Municipal Agrarian Reform Program Officers (MARPOs) ug mga provincial personnel.
Gidumala sa Gender and Development Focal Point System (GFPS) ang workshop pinaagi sa re-echo session sa mga nahibal-an gikan sa Commission on Audit (COA)-led GAD training sa Zamboanga City aron mapalapad ang pagpatuman sa gender-responsive governance sa provincial office.
Atol sa workshop, girepaso sa mga partisipante ang mga batakang konsepto sa GAD, may kalabutan nga mga balaod, ug mga himan sama sa Gender Analysis, Gender Mainstreaming Evaluation Framework (GMEF), Harmonized Gender and Development Guidelines (HGDG), ug Gender-Responsive Planning, Budgeting, and Auditing.
Nagpahigayon usab og mga praktikal nga assessment ug group activities aron mas epektibong maaplikar sa mga programa ug serbisyo sa ahensya ang gender-responsive nga mga pamaagi.
Sumala sa DAR-ZN, ang inisyatiba kabahin sa padayon nga paningkamot sa ahensya sa pagtukod og usa ka mas patas, inklusibo, ug responsive nga serbisyo alang sa tanang kliyente ug stakeholders.(IKEN B. GULLEM)
Source: DAR Zamboanga del Norte Province