Napugos og bakwit ang mga residente sa Barangay Matina Pangi human gipatuman sa lokal nga mga otoridad ang mandatory evacuation tungod sa padayon nga pagsaka sa tubig-baha dala sa walay hunong nga pag-ulan.
Base sa pahayag sa Barangay Disaster Risk Reduction and Management Council, gihangyo ug gipabalhin ang mga pamilya ngadto sa mas luwas nga evacuation areas aron malikayan ang posibleng peligro nga mahimo’g idulot sa pagbaha.
Sa bidyo nga gipagawas sa BDRRMC Matina Pangi, makita ang grabe nga kahimtang sa lugar diin misulod na ang baha sa pipila ka panimalay ug padayon ang pag-evacuate sa mga residente.
Nagpadayon usab ang pahimangno sa mga otoridad sa publiko nga magbantay kanunay sa mga anunsyo ug mosunod dayon sa evacuation orders alang sa ilang seguridad.