Opisyal nang gilusad sa Philippine Health Insurance Corporation (PhilHealth) ang Guaranteed and Accessible Medications for Outpatient Treatment (GAMOT) Program didto sa Annex Building sa Zamboanga del Norte Medical Center (ZNMC) sa Barangay Sicayab ning siyudad niadtong Mayo 28.
Kabahin ang maong programa sa pagpalapad sa Yaman ng Kalusugan Program (YaKaP) nga nagtumong sa paghatag og mas accessible nga serbisyo medikal alang sa mga miyembro sa PhilHealth ug ilang mga benepisyaryo.
Pinaagi sa GAMOT Program, mahimo nang makapahimulos ang mga kwalipikadong miyembro og libre nga tambal nga mokabat sa P20,000 matag tuig. Gipalapdan usab sa PhilHealth ang lista sa mga tambal nga mahimong ma-avail, diin niabot na kini sa 75 ka klase sa medisina.
Gipasiugda usab ni Dr. Esmeralda A. Nadela ang padayon nga pag-uswag sa ZNMC ubos sa administrasyon ni Governor Darel Dexter T. Uy pinaagi sa pagdugang sa mga pasilidad, serbisyo, medical equipment ug tambal alang sa katawhan.
Mihatag usab og mensahe sa suporta si Zamboanga del Norte 2nd District Board Member Dante Ricky G. Bagarinao isip representante ni Gov. Uy, samtang si Vice Mayor Senen O. Angeles mipaabot usab og suporta alang kang Mayor Roberto Y. Uy.
Sa iyang inspirational message, giingon ni PhilHealth Regional Office 9 Regional Vice President Paolo Johann C. Perez nga tumong sa PhilHealth nga masiguro nga walay pamilya nga maglisod tungod lamang sa sakit.
Human sa programa, gitagaan og higayon ang mga nanambong sa pagpangutana kabahin sa YaKaP ug GAMOT Program aron mas masabtan nila ang mga benepisyong ilang mahimong mapahimuslan.
Giawhag usab sa PhilHealth ang publiko nga mobisita sa accredited YaKaP facilities alang sa First Patient Encounter (FPE) ug clinical consultation aron makasugod sa pag-avail sa programa.(IKEN B. GULLEM)
Source: Zamboanga del Norte Provincial News Network