Dakong kalampusan alang sa katawhan sa Sindangan ug sa kasikbit nga mga lungsod ang nakab-ot niini human ang opisyal nga pag-abli sa Sindangan People’s Dialysis Center niadtong Pebrero 16, 2026.
Gipahigayon ang blessing ug ribbon cutting ceremony isip timaan sa pagsugod sa mas duol ug mas abot-kayang serbisyong dialysis para sa mga residente sa lungsod.
Gisugdan ang maong proyekto atol sa termino ni kanhi Mayor Rosendo “Dodoy” S. Labadlabad ug padayong gipaluyohan sa administrasyon ni Mayor Glona G. Labadlabad.
Mitambong usab si Vice Mayor Nilo Florentino Z. Sy, mga miyembro sa Sangguniang Bayan, mga department heads, barangay captains, RHU personnel, ug si Cristy Vesagas nga nagrepresentar sa Department of Health.
Pinaagi sa maong pasilidad, ang mga pasyenteng nanginahanglan og regular nga dialysis dili na kinahanglan mobiyahe sa layo aron makadawat og tukmang pagtambal. Gilauman nga magsugod ang operasyon sa dialysis center karong buwana o sa sayong bahin sa sunod nga bulan.(IKEN B. GULLEM)
Source: Local Government Unit of Sindangan