Dili na kinahanglan pa nga molakaw og layo ang mga mag-uuma aron makadawat og serbisyo, kay ang Department of Agrarian Reform (DAR) Zamboanga del Norte mismo ang nidool sa katawhan pinaagi sa DAR-Zamboanga del Norte Caravan nga gihimo sa Barangay Lopoc, Labason.
Gipangunahan ang kakihokan sa DAR provincial team kauban ang mga opisyal ug technical staff, nga nagtumong sa pagdala sa mga programa, kagamitan, ug serbisyong legal direkta sa mga Agrarian Reform Beneficiaries (ARBs) sa komunidad.
Usa sa pinakaimportante nga nahitabo mao ang paghatag og mini-tractor sa Lawigan Agrarian Reform Beneficiaries Association, usa ka tabang nga gilauman nga makapadali sa ilang umahan ug makadugang sa produksiyon sa agrikultura. Dugang pa niini, nakadawat usab og organic fertilizer ang ubang asosasyon sa mag-uuma isip suporta sa mas luwas ug sustainable nga farming.
Gihimo usab ang usa ka open forum diin giatubang sa DAR ang mga isyu sa yuta, lakip ang problema sa land surveys ug titling. Gihatagan og klarong giya ang mga mag-uuma pinaagi sa legal team aron mas masabtan nila ang ilang katungod ug proseso sa yuta.
Dugang pa, gihisgutan sa technical team ang potensyal sa cacao production isip dugang panginabuhian nga makahatag og mas lig-on nga kita sa umaabot.
Kini nga kalihokan gisuportahan sa mga lokal nga opisyal sa Labason, nga mipadayag sa ilang pasalig sa padayon nga pagtabang sa sektor sa agrikultura ug sa mga mag-uuma nga mao’y backbone sa ekonomiya sa ilang komunidad.(IKEN B. GULLEM)
Source: DAR Zamboanga del Norte Province