Gipakusgan sa lokal nga gobyerno sa Dapitan ang ilang dugayng plano sa pagpalambo sa kabataan pinaagi sa sports ug arts, samtang gisugdan ang pagpangandam alang sa BATANG DASIG: Free Sports and Arts Summer Camp 2026.
Sa usa ka coordination meeting nga gihimo sa Sangguniang Panlungsod Session Hall, nagtapok ang mga city officials, coaches, ug organizers aron plantsahon ang mga programa ug aktibidad nga ipahigayon gikan Mayo 11 hangtod Hunyo 5.
Ang BATANG DASIG usa ka flagship program sa siyudad nga nagtanyag og libre nga training sa sports ug arts alang sa mga batang edad 5 hangtod 16 anyos. Bukas kini sa tanang gustong makasinati og bag-ong kahanas, labi na ang mga bag-ohan nga gusto makadiskubre sa ilang talento.
Lakip sa ipahigayon karong tuiga ang 17 ka disiplina—11 sa sports ug 6 sa arts—nga maghatag og structured coaching, workshops, ug friendly exhibitions aron mapalig-on ang abilidad sa kabataan.
Gipasabot sa city government nga dili lang kini usa ka seasonal nga kalihokan, kundili kabahin sa mas lapad nga plano sa paghulma sa umaabot nga mga atleta ug artist sa Dapitan. Apil sa mga gilantaw nga lakang ang pagtukod og sports hub, pagkuha og permanenteng coaches, ug paghatag og insentibo sa mga mananaog sa nagkalain-laing kompetisyon.
Pinaagi sa BATANG DASIG 2026, nagpadayon ang Dapitan sa paghatag og kahigayunan sa kabataan aron mahimong aktibo, mamugnaon, ug andam sa mas dagkong hagit sa umaabot.(IKEN B. GULLEM)
Source: City Government of Dapitan