ZAMBOANGA PENINSULA — Napamatud-an pag-usab sa Department of Agrarian Reform Regional Office IX ang ilang lig-on nga sistema sa serbisyo human kini malampusong nakapasar sa annual ISO 9001:2015 recertification audit niadtong Enero 23, 2026. Ang kalampusan nagpanghimatuud sa padayong paningkamot sa ahensya sa kalidad, kaepektibohan, ug matinud-anong pagserbisyo sa katawhan.
Gipahigayon ang audit sa TÜV NORD, usa ka internasyonal nga certification body, pinaagi sa kombinasyon sa face-to-face ug online nga pamaagi. Gisusi dinhi ang mga dokumentadong sistema, aktuwal nga operasyon sa opisina, ug pagpatuman sa mga nag-unang programa lakip ang Land Tenure Security Program, Agrarian Justice Delivery Program, Agrarian Reform Beneficiaries Development and Sustainability Program, ug Support to Operations Division.
Gipangulohan sa regional management team ang maong audit nga naglakip sa mga opisyal ug division chiefs sa DAR Regional Office IX. Lakip usab sa gi-evaluate ang mga support services sama sa information technology systems, records management, ug pasilidad sa opisina. Pinaagi niini, napalig-on ang komitment sa DAR Regional Office IX sa pagpadayon sa internasyonal nga kalidad nga serbisyo alang sa mga benepisyaryo sa repormang agraryo sa tibuok rehiyon.(JENIFFER JR. DELICA)
Source: DAR Region IX