DAPITAN CITY — Misugod dayon ang personnel sa Dapitan City Fire Station Shift A niadtong Enero 23, 2026, human makadawat og emergency medical call sa Barangay Kauswagan. Sa pag-abot sa team, ilang nakit-an ang 80-anyos nga babaye nga buhi ug conscious apan nagpakita og kahuyang sa lawas, kaputli sa panit, ug nagreklamo og kasakit sa tiyan.
Ubos sa pangulohan ni Acting City Fire Marshal Fire Senior Inspector Rommel M. Rojas, gihimo dayon ang initial assessment ug first aid intervention sa lugar. Gipahimutang ang pasyente sa husto nga posisyon aron mapahapsay ang pagginhawa, ug gilista dayon ang iyang vital signs samtang gihatagan og agarang tabang medikal.
Human masuta nga dili igo ang on-site care, dali ug maampingong gisakay ang pasyente sa ambulansya ug gidala sa pinakaduol nga ospital alang sa dugang nga pagtambal, uban sa pagtugot sa pamilya. Ang paspas ug organisadong aksyon sa mga bombero nagpakita sa ilang andam ug dedikasyon sa pagluwas sa kinabuhi sa matag tawag sa emerhensiya.(JENIFFER JR. DELICA)
Source: BFP R9 Dapitan City Fire Station