Gibansay sa Department of Agrarian Reform o DAR-Zamboanga del Norte ang mga miyembro sa Agrarian Reform Beneficiaries Organizations o ARBOs sa lungsod sa Liloy pinaagi sa Insurance Underwriting Training aron mapalig-on ang ilang kahibalo sa agricultural insurance ug pagdumala sa risgo sa pagpanguma.
Gihatud sa training ang praktikal nga kahibalo bahin sa pag-assess sa risgo, hustong pagproseso sa dokumento ug insurance claims aron malikayan ang pagkapakyas sa pagkuha og benepisyo sa insurance. Si Darwin M. Camingao gikan sa Philippine Crop Insurance Corporation o PCIC maoy nahimong resource speaker ug mipasabot sa kaimportante sa tukmang farm data ug pagsunod sa insurance requirements.
Mitambong sa maong pagbansay ang Godod Farmers Multi-Purpose Cooperative ug Barangay Buenavista Gutalac Farmers Association Incorporated diin aktibong miapil ang mga miyembro sa workshops ug diskusyon aron mas masabtan ang sistema sa agricultural insurance ug mapalambo ang ilang organisasyon.
Sumala sa DAR-Zamboanga del Norte ubos sa liderato ni PARPO II Daisy Dell Suan Digamon ug PARPO I Engr. Alfonso A. Tan, kabahin kini sa padayon nga programa sa ahensya aron mapalig-on ang kapasidad sa mga ARBOs, mapakunhod ang denied insurance claims ug mas maproteksyunan ang panginabuhian sa mga mag-uuma sa probinsya.(JENIFFER JR. DELICA)
Source: DAR Zamboanga del Norte