Naserbisyohan ang kapin sa 60 ka mga pasyente atol sa libreng Neuro ug Spine Check-Up nga gipahigayon sa Zamboanga del Norte Medical Center sa Dipolog City pinaagi sa tabang nila Dr. Alain Salloman ug Dr. Justine Briones. Ang maong kalihokan nagtumong sa paghatag og espesyal nga konsultasyon ug pag-atiman sa mga adunay problema sa utok, spine, ug uban pang neurological conditions.
Gikonsulta ug gi-assess sa mga espesyalista ang mga pasyente aron mahatagan dayon og tukmang rekomendasyon ug tambal alang sa ilang kahimtang. Dako kini nga tabang ilabina sa mga pasyenteng lisod makapangita og espesyalistang doktor gawas sa probinsya.
Giatiman usab ang mga pasyente sa pagparehistro sa “Yakap” program aron makabenepisyo sila sa libreng laboratory diagnostics, medisina ug uban pang medical assistance nga gihatag sa ZNMC. Sumala sa mga tigpasiugda, tumong sa programa nga mapadali ug mapaduol ang serbisyong panglawas ngadto sa katawhan.
Gipasalamatan sa ZNMC Medical Team nga gipangulohan ni Herdina Gallegos, uban sa suporta ni Hospital Administrator Dr. Esmeralda Nadela ug Gov. Darel Uy, ang tanang nitabang sa kalampusan sa maong aktibidad nga nagpadayon sa paghatag og libre ug dekalidad nga serbisyong medikal alang sa mga Zanortehanon.(JENIFFER JR. DELICA)
Source: Zamboanga del Norte Medical Center