Mitambong ang Department of Agrarian Reform Region 9 o DAR IX sa nasudnong Program Review ug Coordination Workshop alang sa Land Tenure Security Program nga gipahigayon niadtong Mayo 5 hangtod 7 sa Puerto Princesa, Palawan.
Gipasiugdahan sa DAR Central Office ang tulo ka adlaw nga workshop uban sa DENR, Land Registration Authority ug Land Bank of the Philippines aron hisgutan ang kahimtang sa mga programa sa yuta ug serbisyo alang sa mga benepisyaryo sa agrarian reform. Gituki usab dinhi ang mga hagit, problema ug mga pamaaging makatabang sa mas paspas nga pagpatuman sa mga programa sa gobyerno.
Gihisgutan sa mga partisipante ang mga programa sama sa Land Acquisition and Distribution, Project SPLIT, ug paghatag sa Certificates of Condonation with Release of Mortgage o CoCROM. Gipresentar usab sa matag rehiyon ang ilang mga nahimo ug mga isyu nga kinahanglan masulbad aron mapalig-on ang pagdumala sa land tenure programs.
Gipasiugda sa DAR IX nga padayon nilang lig-onon ang serbisyo alang sa mga Agrarian Reform Beneficiaries sa Zamboanga Peninsula pinaagi sa mas epektibong koordinasyon uban sa ubang ahensya sa gobyerno aron masiguro ang tukmang pagpanag-iya ug pagdumala sa yuta sa mga mag-uuma.(JENIFFER JR. DELICA)
Source: DAR Region IX