Duha ka pasyente gikan sa lungsod sa Salug ang malampusong na-admit sa Zamboanga del Norte Medical Center (ZNMC) alang sa cranioplasty operation pinaagi sa tabang sa lokal nga kagamhanan ug sa Medical Mission Program sa lalawigan.
Ang mga pasyente mao sila si Ronilo Lumanog, 57 anyos, taga Sitio Lumbia, Canawan, ug si Julie Caliso, 38 anyos, taga Pacuhan, nga parehong magpailalom sa operasyon ubos sa pag-atiman sa mga espesyalistang doktor.
Nahimong posible ang maong serbisyo pinaagi sa inisyatiba ni Governor Darel Dexter T. Uy nga nagdala og mga neuro specialists gikan sa Cebu aron mahatagan og espesyal nga pagtambal ang mga pasyente sa probinsya nga dili na kinahanglan mobiyahe pa gawas sa Zamboanga del Norte.
Dugang pa, libre ang operasyon ug adunay zero billing sa hospital, nga dako og kahupayan sa mga pamilya sa mga pasyente nga kasagarang maglisod sa gasto sa maong matang sa medikal nga serbisyo.
Gipasalamatan sa mga benepisyaryo ug ilang pamilya si Governor Uy ug si Mayor Dra. Ruth M. Brillantes tungod sa ilang padayon nga suporta sa mga programa nga nagtutok sa paghatag og accessible ug dekalidad nga serbisyo panglawas sa katawhan.(JENIFFER JR. DELICA)
Source: Salug Medical Team