Dakong Garbo na usab ang gipadayag sa City Government of Dapitan human misidlak sa international boxing stage ang Dapitanong si Ranelio Quizo human masakmit ang Fight World No. 1 (FW1) title sa Namyangju Sports Complex sa South Korea niadtong Abril 4–5, 2026, nga nagdala og dakong dungog sa Dapitan ug sa tibuok Pilipinas.
Nailhan ang 27-anyos nga boksingero, sa angga nga “El Gatillo,” midaog pinaagi sa split decision sa usa ka mabangis nga 10-round nga laban, nga nagpakita sa iyang kusog, disiplina, ug walay hunong nga fighting spirit.
Matud pa sa report, duha lamang sa lima ka Pilipinong boksingero ang nakadaog sa maong kompetisyon, lakip si Quizo—nga nagpamatuod sa kalisod ug taas nga lebel sa away sa international stage.
Gikan sa yano nga komunidad sa Barangay Antipolo, misaka si Quizo sa boxing scene sukad nagsugod siya niadtong 2017 aron matabangan ang iyang pamilya. Sukad niadto, nagpadayon siya sa pagpakita og abilidad sa mga laban sa Manila ug sa gawas sa nasud.
Samtang, dako ang papel sa iyang igsoon ug trainer nga si Chandler Quizo sa iyang kalampusan, nga maoy naggiya ug nagtukod sa iyang pundasyon sa boksing.
Sa laing bahin, ikaduha na kini nga kadaugan ni Quizo sa South Korea, nga nagpalig-on sa iyang ngalan isip usa sa mosubang nga Filipino boxer sa international arena.
Sa pagkakaron, nagpadayon siya sa iyang karera samtang nagtrabaho alang sa kaugmaon sa iyang pamilya, lakip ang iyang anak.(IKEN N. GULLEM)
Source: City Government of Dapitan