Andam na ang Philippine Army pinaagi sa Reserved Command (RESCOM) ug 902nd Community Defense Center (CDC) sa pagpahigayon sa “Lakad-Kalayaan” o Freedom March karong umaabot Abril 9, 2026, isip kabahin sa pagsaulog sa Araw ng Kagitingan.
Pagasugdan ang kalihukan alas 7:00 sa buntag gikan sa P’gsalabuk Circle (Rotonda) sa Gen. Luna Street padulong sa Provincial Capitol, diin himuon usab ang flag raising ceremony.
Sumala sa mga tigpasiugda, ang maong kalihukan gitumong aron pagpasidungog sa kaisog ug sakripisyo sa mga sundalong Pilipino ug Amerikano atol sa World War II. Lakip usab sa tuyo niini ang pagdasig alang sa pagpakabana sa publiko dinha sa pagpanalipod sa West Philippine Sea, nga nagdugtong sa sakripisyo sa atong mga bayani.
Gilauman ang partisipasyon sa mga reservists, beterano, ROTC cadets, partner stakeholders ug mga lokal nga kagamhanan sa tibuok probinsya sa Zamboanga del Norte. Samtang, giawhag usab ang publiko sa pagsuporta sa maong kalihukan isip simbolo sa panaghiusa ug patriotismo.(IKEN B. GULLEM)
Source: Dipolog City Government