Nagkadaiyang residente gikan sa tibuok Zamboanga del Norte ang gilauman nga makadawat og libreng serbisyo sa panglawas pinaagi sa 292nd Tzu Chi Medical and Surgical Mission nga gisugdan niadtong Agosto 6 ug modagan hangtod Agosto 8.
Kapin sa 266 ka boluntaryo gikan sa Pilipinas, Taiwan, ug Malaysia ang nagtigom aron maghatag og libreng medical consultation, dental ug eye care services, tambal, ug surgical procedures alang sa mga Zanortehanon.
Atol sa opening program, gipasalamatan ni Dr. Anton Mari H. Lim ang mga lokal nga opisyal, healthcare workers, ug partner institutions sa ilang kooperasyon nga nakapahimo sa tulo ka adlaw nga humanitarian mission.
Lakip sa mga boluntaryo ang mga miyembro sa Tzu Chi Youth, mga magtutudlo ug estudyante sa Tzu Chi University, ingon man mga volunteer gikan sa Manila, Zamboanga City, ug Malaysia.
Matud ni Lim, ang pag-apil sa mga internasyonal nga boluntaryo nagpakita sa padayon nga paningkamot sa Tzu Chi sa paghatag og healthcare ug humanitarian assistance nga milapas sa mga utlanan sa nasud.
Gilauman nga liboan ka mga residente gikan sa nagkadaiyang lungsod sa lalawigan ang makabenepisyo sa maong misyon, nga nagtumong sa paghatag og dekalidad ug libreng serbisyo medikal ilabina sa mga nanginahanglan.(IKEN B. GULLEM)
Source: Zamboanga del Norte Provincial News Network