Nagpakita og suporta si Dapitan City Mayor Evelyn “Belen” T. Uy sa mga miyembro sa Enhanced Gasang Bahandianon sa Umahan (EGBU) sa Barangay Barcelona atol sa iyang pagbisita sa maong proyekto niadtong Hunyo 17.
Sa mensahe niini, gidasig ni Mayor Uy ang mga mag-uuma nga padayon nga paningkamotan ang pagpalambo sa ilang uma ug tan-awon ang agrikultura isip usa ka negosyo nga makahatag og dugang kita sa ilang pamilya.
Gipasalig usab ni Mayor Uy nga magpadayon ang suporta sa lokal nga panggamhanan pinaagi sa paghatag dili lamang og mga panginahanglanon sa pagpanguma, kondili usab og mga pagbansay sa pagdumala sa negosyo, marketing, ug bookkeeping aron mahimong mas lig-on ang panginabuhian sa mga mag-uuma.
Ang EGBU usa sa mga programang gipasiugdahan aron mapahimuslan ang mga wala matamni nga yuta ug mahatagan og dugang oportunidad ang mga mag-uuma sa pagpalambo sa ilang panginabuhi pinaagi sa agrikultura.(IKEN B. GULLEM)
Source: Zamboanga del Norte Provincial News Network