Nadakpan sa kapulisan ang usa ka 42-anyos nga lalaki nga wanted sa kasong paglapas sa balaod nga nanalipod sa mga bata batok sa abuso, pagpahimulos ug diskriminasyon. Ang pagdakop nahitabo sa MEPZ 1, Barangay Ibo, Lapu-Lapu City niadtong nakalabay nga mga adlaw.
Gipahigayon ang operasyon pinaagi sa hiniusang paningkamot sa Intelligence and Warrant Section sa Danao City Police Station ug sa Police Station 2 sa Lapu-Lapu City Police Office. Tumong sa operasyon ang pagserbisyo sa warrant of arrest batok sa akusado nga dugay nang gipangita sa mga otoridad.
Ang lalaki gipasanginlan sa kasong Lascivious Conduct ubos sa Section 5(b) sa Republic Act No. 7610 o ang Special Protection of Children Against Abuse, Exploitation and Discrimination Act. Ang warrant gi-isyu sa Regional Trial Court Branch 70 sa Lapu-Lapu City ug adunay gitakdang piyansa nga ₱80,000 alang sa iyang temporaryong kagawasan.
Human sa pagdakop, gipahibalo ang akusado sa iyang kaso ug sa iyang mga katungod ubos sa balaod sa wala pa siya itugyan ngadto sa Police Station 2 alang sa hustong dokumentasyon ug disposisyon. Gidayeg ni CPPO Director PCOL Abubakar Udang Mangelen Jr. ang mga operatiba ug gipasiugda nga magpadayon ang kampanya sa kapulisan batok sa mga wanted person aron mapanalipdan ang komunidad ug masiguro ang hustisya alang sa mga biktima, ilabina ang mga kabataan.
I via Renante Socia Lada