Atol sa gipahigayong duha ka adlaw nga Seminar-Workshop sa Gender and Development (GAD) Plans ug Budgets kaniadtong Marso 24–25, gipalig-on sa City Government of Dapitan ang papel sa mga barangay sa pagpanguna sa inclusive development.
Ang maong kalihokan nagtigum sa mga lider sa departamento ug GAD focal persons aron mahatagan sila og kahibalo ug himan sa pagplano ug pagmonitor sa mga programa nga nagpalig-on sa katungod sa kababayen-an ug uban pang marginalized sectors sa komunidad.
Gipasabot usab sa mga resource speakers ang kahinungdanon sa gender analysis ug datos aron matino ang tinuod nga panginahanglan sa barangay ug mahatagan og angay nga solusyon. Sa mensahe ni Mayor Evelyn “Belen” T. Uy, gibutyag niini nga ang maong inisyatibo usa ka pamaagi sa siyudad sa pagpalapad sa gahum sa lokal nga liderato.
Gihimo kini sa Livelihood Promotion and Technology Development Center sa Barangay San Pedro ug gihuptan sa technical guidance sa LGOO VI River A. Tabada-Merida ug LGOO II Lea Mica S. Recososa, samtang gi-facilitate ni CLGOO Monette Ruaya-Ahmad uban ni Susan Empeynado, GAD Vice-Chairperson, nga nagtabang sa mga lider sa pagbansay sa praktikal nga pagplano ug pag-aplikar sa GAD principles.(IKEN B. GULLEM)
Source: City Government of Dapitan