Nagpadayon ang pagpasigarbo sa Dakbayan sa Dapitan human makab-ot ang sunod-sunod nga kadaugan sa It’s Showtime segment nga Tawag ng Tanghalan ni Jhunyl Ken Eguia ug Franchinni De La Cruz, nga opisyal nang gihirang isip Daily Winners sa ilang tagsa-tagsa ka performance niadtong Marso 25 ug Marso 26, 2026.
Ang duha ka talento usa ka estudyante sa Jose Rizal Memorial State University, diin ilang gisabay ang akademikong responsibilidad ug ang ilang padayon nga paglambo sa larangan sa musika. Ilang gipakita ang lig-on nga dedikasyon ug kahago nga maoy nagdala kanila sa nasudnong entablado.
Sa wala pa pagbiyahe padulong sa Manila, mibisita si Franchinni kang Mayor Evelyn “Belen” T. Uy aron mangayo og panalangin. Gipahayag usab sa mayor ang bug-os nga suporta sa lokal nga panggamhanan ug ang pagsalig sa abilidad sa batan-ong mananaygon nga mopasikat sa ngalan sa Dapitan.
Tungod sa ilang impresibong back-to-back nga kadaugan, mosaka na sila sa Weekly Finals sa maong kompetisyon. Samtang, ang tibuok Dapitan nagkahiusa sa pag-awhag ug pag-ampo alang sa ilang dugang kalampusan samtang ilang gidala ang dungog ug garbo sa siyudad sa mas lapad nga entablado sa nasud.(IKEN B. GULLEM)
Source: City Government of Dapitan