Gipahigayon sa Lokal nga Kagamhanan sa Dapitan uban sa City Social Welfare and Development Office ang 2025 National Celebration of Elderly Filipino Week sa Dapitan City Cultural and Sports Center ubos sa tema nga “Embracing Age: Living a Life with Dignity and Purpose.”
Misalmot si Mayor Evelyn T. Uy isip halangdong bisita ug mipasabot sa importansya sa mga senior citizen sa dakbayan. Gipasiugda niya nga magpadayon ang city government sa pagpanalipod sa katungod ug kahimsog sa mga tigulang pinaagi sa mga programa ug kalihokan nga nag-awhag sa aktibong panginabuhi.
Gipasidungog usab ang mga mananaog sa nagkadaiyang pasundayag sama sa pagkanta ug Zumba showcase nga gipasiugdahan sa mga senior citizen. Gitapos ni FISCAP President Nicanor Galanido ang kalihokan pinaagi sa pag-awhag sa padayon nga panaghiusa ug suporta alang sa sektor sa mga tigulang.(Jeniffer Jr. Delica)
Source: Zamboanga del Norte Provincial News Network