Gipakita sa mga scout sa Ilaya National High School ang ilang pagkaandam sa panahon sa emerhensiya pinaagi sa Fire Square Roadshow nga gipahigayon sa Dapitan City Fire Station niadtong Agosto 22, 2026.
Ang kalihokan gipangunahan sa mga personahe sa Dapitan City Fire Station ubos sa pagpanguna ni FSINSP Rommel M. Rojas, REE, Acting City Fire Marshal, isip kabahin sa Pinagsamang Sabay-sabay na School-Based Encampment 2026 sa Boy Scouts of the Philippines ug Girl Scouts of the Philippines.
Atol sa kalihokan, gitudloan ang mga partisipante sa hustong paggamit sa fire extinguisher pinaagi sa TPASS method, aron masayran nila ang tukmang paagi sa pag-atubang sa gagmay nga sunog.
Gipahigayon usab ang Fire Drill ug Earthquake Drill aron masanay ang mga kabatan-onan sa hapsay ug luwas nga paglikas kung adunay sunog, linog o uban pang peligro.
Pinaagi sa maong programa, mas nasabtan sa mga scout nga ang ilang responsibilidad dili lamang kutob sa pagkat-on sa scouting skills, apan apil usab ang pagkahimong andam ug responsable sa pag-atubang sa mga emerhensiya.
Gipasalamatan usab ang mga magtutudlo, kawani ug administrasyon sa Ilaya National High School sa ilang kooperasyon ug suporta sa mga programa nga nagtumong sa pagpalig-on sa kaluwasan sa mga kabatan-onan.(IKEN B. GULLEM)
Source: BFP R9 Dapitan City Fire Station