Gihatagan og dugang kahibalo ug kahanas ang mga Barangay Peacekeeping Action Teams (BPATs) sa Barangay Dabiak ug Carupay, Katipunan, Zamboanga del Norte, pinaagi sa usa ka espesyal nga pagbansay alang sa mas epektibong pagmintinar sa kalinaw ug seguridad sa ilang mga komunidad.
Gipahigayon ang training sa Katipunan Municipal Police Station, ubos sa pagpanguna ni PMAJ Evelyn F. Porras, Acting Chief of Police, uban sa koordinasyon sa mga opisyal sa Barangay Dabiak ug Carupay.
Gihimo ang kalihokan sa Covered Court sa Barangay Dabiak, diin gipalambo ang kahibalo ug kahanas sa mga Barangay Tanod sa pagmintinar sa kalinaw ug kahusay, pagpugong sa krimen, ug hustong pagtubag sa mga kabalaka ug insidente sa komunidad.
Gipasiugda usab sa maong pagbansay ang kamahinungdanon sa lig-on nga koordinasyon tali sa mga Barangay Tanod, Philippine National Police (PNP) ug uban pang mga hingtungdan aron mas epektibong matubag ang mga panginahanglanon sa komunidad.
Pinaagi niini, mas maandam ang mga Barangay Tanod sa pagtuman sa ilang mga katungdanan isip mga frontliner sa kalinaw, kahusay, kaluwasan ug seguridad sa publiko.(IKEN B. GULLEM)
Source: Katipunan Municipal Police Station ZNPPO