Nagtipon ang mga tourism officers gikan sa tibuok probinsya atol sa 2nd Quarter Meeting sa Association of Tourism Officers of Zamboanga del Norte (ATOZan) nga gipahigayon sa Provincial Capitol niadtong Mayo 14 aron hisgutan ang dugang pagpalambo sa turismo sa lalawigan.
Nasentro sa panagtigom ang mga pagpangandam alang sa SAULOG Festival 2026, SEC registration sa organisasyon, partisipasyon sa ATOP National Convention sa Ormoc City, ug updates sa nagkalain-laing tourism programs ug aktibidad sa mga lungsod ug dakbayan sa probinsya.
Mitambong sa maong kalihokan ang mga representante gikan sa 25 ka lungsod ug mga dakbayan sa Dipolog ug Dapitan diin aktibo silang nagbahin og mga ideya ug suhestiyon aron mas mapalig-on pa ang tourism development ug promosyon sa kultura ug mga tourist destinations sa Zamboanga del Norte.
Gipangulohan ang sesyon ni Baliguian Municipal Tourism Officer ug kasamtangang ATOZan President Taj Mahal Esmali, nga mipasiugda sa kahinungdanon sa panaghiusa ug kooperasyon sa tanang tourism stakeholders aron mas mapalambo pa ang industriya sa turismo sa probinsya.
Samtang nagpadayon ang paningkamot sa pagduso sa turismo, gipadayag usab sa mga miyembro ang ilang excitement alang sa umaabot nga 3rd Quarter Meeting nga pagahostingan sa Municipality of Kalawit.(JENIFFER JR. DELICA)
Source: Zamboanga del Norte Provincial News Network