Gipasiugda sa City Government of Dapitan ang padayon nga suporta niini sa mga programa sa restorative justice pinaagi sa pakigtambayayong sa Dapitan City Parole and Probation Office atol sa pagsaulog sa ika-50 nga anibersaryo sa Department of Justice-Parole and Probation Administration (DOJ-PPA) niadtong Hulyo 1.
Gipangunahan ni Mayor Evelyn “Belen” T. Uy ug ni Chief Nelson C. Bedua sa Dapitan City Parole and Probation Office ang mga kalihokan nga naglakip sa thanksgiving mass sa St. James the Greater Parish ug community clean-up drive sa Sunset Boulevard.
Sumala sa LGU, ang maong panagtambayayong nagpakita sa komitment sa lokal nga panggamhanan sa pagsuporta sa rehabilitasyon ug reintegrasyon sa mga kliyente sa parole ug probation, samtang gipalig-on usab ang kalinaw, kahapsay, ug kaluwasan sa komunidad pinaagi sa Peace and Order and Public Safety (POPS) agenda.
Pinaagi sa maong inisyatiba, padayon nga gipalambo sa Dapitan City ang mga programa nga nag-awhag sa responsableng pagkalungsoranon, partisipasyon sa komunidad, ug mas inklusibong katilingban.(IKEN B. GULLEM)
Source: City Information Division- Dapitan