Mas paspas nga pagresponde sa mga emerhensiya ang gilauman sa 13 ka barangay sa Kalawit human giturn-over sa Provincial Government of Zamboanga del Norte ang bag-ong emergency rescue vehicles niadtong Hulyo 2, isip kabahin sa paningkamot nga mapaduol ang rescue services sa matag komunidad.
Gipangunahan ni Governor Darel Dexter T. Uy ang turnover ceremony sa Kalawit Municipal Gymnasium uban ni Mayor Arcel Antojado, Vice Mayor Rey Y. Bihag, ug ABC President Anthony Molina.
Matud ni Gov. Uy, ang pagbutang og rescue vehicles sa mga barangay makatabang sa mas dali nga pagresponde sa mga emerhensiya, ilabina sa mga aksidente ug kalamidad, ug makapamenos sa pagsalig sa municipal responders.
Samtang, ang Barangay Poblacion mipili sa pagtukod og single-barrel box culvert sa Sitio Maguboc imbes modawat og rescue vehicle, tungod kay adunay na kini nagamit nga rescue unit. Gidayeg sa gobernador ang maong desisyon isip ehemplo sa paghatag og prayoridad sa labing gikinahanglan sa komunidad.
Gipasiugda usab ni Gov. Uy ang kamahinungdanon sa koordinasyon ug panaghiusa sa mga lokal nga panggamhanan aron masiguro ang epektibo ug paspas nga paghatag og serbisyo sa katawhan.(IKEN B. GULLEM)
Source: Zamboanga del Norte Provincial News Network