Gilunsad sa City Government of Dapitan ang Zero Open Defecation (ZOD) Challenge: A Race to Sanitation and Health – Stage 2 sa Jose Rizal Memorial State University (JRMSU) CNAHS Building isip kabahin sa padayon nga paningkamot sa siyudad sa pagpalig-on sa sanitasyon ug pagpanalipod sa panglawas sa komunidad.
Human makabaton sa Grade 1 ZOD Certification niadtong Disyembre 2025, gipunting karon sa siyudad ang pagkab-ot sa Grade 2 ZOD Status. Nagkinahanglan kini nga tanang panimalay adunay sanitary toilet ug ang tanang eskwelahan ug health center adunay pasilidad nga nakasunod sa sanitation standards.
Naghiusa sa maong inisyatiba ang City Government of Dapitan, Department of Health (DOH), City Health Office, Jose Rizal Memorial State University (JRMSU), Department of the Interior and Local Government (DILG), Department of Social Welfare and Development (DSWD), Philippine National Police (PNP), ug mga barangay aron mapapas ang open defecation, mapalambo ang sanitasyon, ug malikayan ang water-borne diseases.
Atol sa kalihokan, gipasiugda ni City Mayor Evelyn “Belen” T. Uy nga makab-ot sa Dapitan ang Grade 2 ZOD Status pinaagi sa panaghiusa sa tanang sektor. Ingon usab, iyang gipahibalo ang cash incentive alang sa unang napulo ka barangay nga makakab-ot sa Grade 2 ZOD Status, diin gamiton ang insentibo alang sa mga proyekto sa komunidad.
Lakip usab sa kalihokan ang mga technical briefing bahin sa sanitasyon, presentasyon sa lokal nga health data, ug giya sa pagtukod sa mga sanitary toilet nga nakasunod sa mga sumbanan.(IKEN B. GULLEM)
Source: Dapitan City Government