Gilunsad sa Dapitan City ang Kinabayo 2026 Open Sailboat Competition niadtong Hulyo 11, nga nagtimaan sa pagsugod sa usa sa mga tradisyonal nga kalihokan sa Kinabayo Festival nga nagpasidungog sa adunahang kultura sa paglayag ug panginabuhian sa mga mangingisda.
Gitigoman sa kompetisyon ang mga mangingisda gikan sa nagkalain-laing baybaying barangay, diin ilang gipakita ang ilang kahanas sa paglayag gamit ang tradisyonal nga layag o mga sakayan nga gipalihok sa kusog sa hangin.
Labaw sa usa ka panagsangka, ang kalihokan nagsilbing pagpasiugda sa kahinungdanon sa dagat isip tinubdan sa panginabuhi sa daghang Dapitanon ug sa pagpadayon sa usa ka tradisyon nga bahin sa identidad sa siyudad.
Mitambong sa maong kalihokan sila City Councilors Erasmo Bayron ug Dennis A. Tan, Engr. Kevin Dorot sa City Agriculture Office, ug mga personnel sa Philippine Coast Guard isip suporta sa programa.
Sa resulta sa lumba, si Rodolfo Buhisan sa Barangay Sicayab Bucana maoy nahimong kampyon, gisundan ni Reynante Colot sa Barangay San Pedro ug Roel Dago-oc sa Barangay Sicayab Bucana. Si Buhisan usab ang nakadaog sa Best in Layag nga kategorya. Ang tanang partisipante nga wala makadaog gihatagan usab og consolation prizes isip pag-ila sa ilang partisipasyon ug dedikasyon.(IKEN B. GULLEM)
Source: Dapitan City Government