Sa tumong nga mapauswag ang kalidad sa serbisyo publiko, gihiusa sa Department of Trade and Industry–Zamboanga del Norte (DTI-ZDN) Provincial Office ang skills enhancement ug team development pinaagi sa Organizational Culture, Safety and Team Development Activity nga gipahigayon sa Hi-Lander Farm sa Barangay Alvenda, Mutia.
Gitutokan sa programa ang pagpalambo sa kapasidad sa mga kawani pinaagi sa pagbansay sa Basic First Aid ug Emergency Preparedness nga gipangunahan sa Bureau of Fire Protection (BFP) Zamboanga del Norte Provincial Office, diin gisundan kini sa practical emergency simulations aron masukod ang ilang kahibalo sa pagresponde sa kritikal nga mga sitwasyon.
Dili lamang sa emergency response nagtapos ang kalihokan, tungod kay gipahigayon usab sa RAPID Team ang serye sa team-building activities nga nagtumong sa paglig-on sa kultura sa organisasyon, pagpataas sa pagsalig sa usag usa, ug pagpalambo sa koordinasyon tali sa mga kawani.
Gibuksan ang programa pinaagi sa mensahe ni Provincial Director Estrella M. Roda ug ni Robert C. Dagpin nga mirepresentar kang CPD Chief Julius C. Salaveria, samtang gitapos kini ni BDD Division Chief Raymunda B. Biolango pinaagi sa pag-awhag sa padayon nga panaghiusa ug hiniusang responsibilidad sa paghatag og mas episyente ug kalidad nga serbisyo sa publiko.(IKEN B. GULLEM)
Sourc: DTI Zamboanga del Norte