Gipili ang Batayan United Farmers Irrigators Association (BUFIA) sa lungsod sa Kalawit isip opisyal nga representante sa Rehiyon 9 alang sa National Search for Most Outstanding Irrigators Association ubos sa CARP-Irrigators Component (CARP-IC) Category para sa tuig 2025.
Miatubang sa nasudnong validation ang Department of Agrarian Reform (DAR) Zamboanga del Norte ubos sa pagpangulo ni Provincial Agrarian Reform Program Officer II Daisy Dell Suan Digamon, kauban ang National Validation Team nga misusi sa kalig-on sa organisasyon ug sa mga kalampusan niini sa pagdumala sa irigasyon ug pagpalambo sa agrikultura.
Gilangkuban ang BUFIA sa 60 ka Agrarian Reform Beneficiaries (ARBs) ug giila tungod sa ilang panaghiusa, epektibong pagpangulo, ug malungtarong mga pamaagi sa pag-uma. Giila usab ang asosasyon sa ilang dakong kontribusyon sa pagpalig-on sa produksyon sa agrikultura ug pagdumala sa mga kahinguhaan sa tubig.
Kabahin sa validation team ang mga opisyal gikan sa DAR Central Office ug Presidential Agrarian Reform Council (PARC) Secretariat, kauban ang mga representante sa National Irrigation Administration (NIA) Central Office ug NIA Region IX aron masusi ang mga programa, kalampusan, ug mga inobasyon nga gipatuman sa asosasyon.
Isip bandera sa Rehiyon 9, gidala sa BUFIA ang paglaom ug garbo sa mga komunidad sa repormang agraryo sa Zamboanga del Norte, samtang nagserbisyo isip ehemplo sa panaghiusa, maayong pagdumala, ug kalampusan sa sektor sa agrikultura.(IKEN B. GULLEM)
Source: DAR Zamboanga del Norte Province