Lig-ong nagpadayon ang pagpalambo sa ika-3 Distrito human opisyal nga gi-turnover ni Cong. Ian Amatong ang dagkong imprastraktura sa lungsod sa Salug ug Liloy niadtong Pebrero 27. Ang maong kalihokan mosunod sa malampusong mass turn-over sa mga proyekto sa Triple SB nga gihimo sa miaging adlaw.
Gipasiugdahan ug gipatuman sa Department of Public Works and Highways 3rd Engineering District ang mga proyekto isip kabahin sa padayon nga programa sa imprastraktura sa distrito. Matud sa kongresista, ang matag proyekto gitumong aron magtukod og mas luwas nga komunidad, magmugna og dugang oportunidad, ug magpaangat sa panginabuhi sa katawhan pinaagi sa lig-on nga panagtambayayong sa nasyonal ug lokal nga panggamhanan.
Sa Salug, gi-turnover ang Sea Wall o River Control Project sa Poblacion aron mapanalipdan ang mga residente batok sa pagbaha ug pagkaanod sa yuta, ingon man ang duha ka andana nga 10-classroom building sa Binoni National High School alang sa Senior High School. Sa Liloy, gi-ablihan ang Multi-Purpose Building nga magsilbing Fish Processing Facility, dugang sa usa ka Multi-Purpose Building sa Barangay Baybay ug mga proyekto sa dalan sa Barangay San Miguel, Causwagan paingon sa Goaw, Communal paingon sa Tapican, ug Cabangcalan.
Mitambong sa turn-over sila Vice Gov. Julius Napigquit, Board Member Venus Uy nga nagrepresentar kang Liloy Mayor Junjun Uy, Board Member Leo Mejorada, Board Member JR Brillantes, Salug Mayor Ruth Brillantes, Vice Mayor Michael Buzon, ug 3rd District Engineer Atty. Romeo Saladaga, uban ang mga barangay officials ug residente nga misaksi sa kalihokan. (JENIFFER JR. DELICA)
Source: Zamboanga del Norte Provincial News Network