Gisugdan karong semanaha sa Department of Agriculture (DA) ang lima ka adlaw nga Province-led Agriculture and Fisheries Extension Systems (PAFES) National Year-End Review, nga nagtuyo sa pagtan-aw balik sa mga kalihukan sa 2025 ug pagtakda ug bag-ong direksyon para sa mosunod nga tuig, nga gipahigayon kaniadtong Nobyembre 17-21, 2025 sa Top Plaza Hotel, Dipolog City.
Daghang representante gikan sa nagkalain-laing regional ug provincial offices sa DA sa tibuok nasud ang mitambong, diin klaro ang pag-ila sa Zamboanga del Norte isip usa sa mga probinsyang aktibong mipatuman ug mitubag sa mga inisyatibo sa agrikultura.
Gipadayag ni Dipolog City Vice Mayor Senen O. Angeles ang mainitong pagdawat sa mga delegado ug iyang gipasabot ang dakong tabang sa DA sa pagpalambo sa panginabuhian sa sektor sa agrikultura sa rehiyon. Samtang si Gobernador Darel Dexter T. Uy nagpasalig nga buo ang suporta sa probinsya aron masiguro nga ang mga programa ug tabang sa DA makaabot ug magamit sa grassroots level, ilabina sa mga mag-uuma ug mananagat.
Usa sa mga gipresenta sa kalihukan mao ang resulta sa monitoring report sa pilot provinces nga giandam ni Mr. Allan Robert U. Monserrat, Agriculturist II. Ang maong report mosilbi nga giya sa pagbag-o ug pagpalig-on sa estratehiya sa PAFES ngadto sa 2026.
Gilauman nga ang maong assessment makatabang sa paglatid ug klaro, episyente, ug koordinado nga plano para sa PAFES implementation sa mas daghang probinsya.(IKEN B. GULLEM)
Source: Zamboanga del Norte Provincial News Network