Pormal nga gipahigayon sa Lokal nga Pangagamhanan sa Gutalac ubos sa liderato ni Municipal Mayor Eddie Justin Quimbo ug gitambongan sa mga barangay kagawad, opisyales sa LGU, ug mga representante sa komunidad ang pag panumpa sa bag-ong gi-appoint nga Punong Barangay sa Barangay Poblacion, kaniadtong Nobyembre 19, 2025.
Si Hon. Delma G. Gallemit opisyal nga mipuli human mipasaka ug irrevocable resignation si kanhi Punong Barangay Hon. Jafen Candelaria, usa ka lihok nga nagtimaan sa padayon nga tin-aw ug responsableng liderato sa Poblacion. Ang pormal nga panumpa usa ka simbolo sa pagpadayon sa maayong serbisyo publiko ug epektibong pagdumala alang sa katawhan.
Sa mensahe ni Mayor Quimbo, gipasabot niya ang importansya sa malig-on ug malinawon nga liderato, diin ang bag-ong kapitan mahimong giya sa mga proyekto ug programa nga nagtinguha sa kaayohan sa tanang residente. Gidugang niya nga ang pag-ilis sa liderato usa ka oportunidad aron mapalig-on ang kolaborasyon tali sa barangay ug LGU, ug masiguro nga ang mga serbisyo mahatud sa tanan nga dapit sa komunidad.
Gilauman usab sa LGU nga pinaagi sa aktibong partisipasyon sa komunidad ug kolaborasyon sa lokal nga pangagamhanan, mas mapaayo ang delivery sa serbisyo publiko ug mas mapaabot sa matag residente ang mga programa sa gobyerno.(IKEN B. GULLEM)
Source: LGU Gutalac- Public Information